![](https://theothertruth.info/wp-content/uploads/2022/10/photo_2022-10-22_17-52-27-3.jpg)
សាលាដំបូងរាជធានីភ្នំពេញ នៅថ្ងៃទី១៩ ខែតុលា ឆ្នាំ២០២២ បានប្រកាសសាលក្រម កាត់ទោស ទណ្ឌិត សម រង្ស៊ី មេក្រុមប្រឆាំងក្រៅច្បាប់ ឱ្យជាប់ពន្ធនាគារអស់មួយជីវិត និងដកសិទ្ធិធ្វើនយោបាយជាស្ថាពរ ទាំងសិទ្ធិបោះឆ្នោត សិទ្ធិឈរឈ្មោះឱ្យគេបោះឆ្នោត និងសិទ្ធិធ្វើនយោបាយផ្សេងទៀត។
![](https://theothertruth.info/wp-content/uploads/2022/10/photo_2022-10-22_17-52-27-2-1024x876.jpg)
ក្រៅពីសម្រេចដាក់ពន្ធនាគារមួយជីវិត និងដកសិទ្ធិធ្វើនយោបាយជាស្ថាពរ ក្រោមការចោទប្រកាន់ពីបទ «ប៉ុនប៉ងនូវប្រគល់ឱ្យរដ្ឋបរទេសនូវដែនដីមួយផ្នែក» តុលាការក្រុងភ្នំពេញ ក៏បានបង្គាប់ឱ្យសមត្ថកិច្ចចាប់ខ្លួនទណ្ឌិត សម រង្ស៊ី យកមកផ្តន្ទាទោសផងដែរ។ ទោះជាយ៉ាងណា តុលាការក៏បានបើកសិទ្ធិឱ្យ លោក សម រង្ស៊ី ប្តឹងតវ៉ាទៅកាន់សាលាឧទ្ធរណ៍ផងដែរ ប្រសិនបើមិនពេញចិត្តនឹងការសម្រេចនេះ។
![](https://theothertruth.info/wp-content/uploads/2022/10/photo_2022-10-22_17-52-26-1024x570.jpg)
សូមបញ្ជាក់ថា លោក សម រង្ស៊ី អតីតប្រធានគណបក្សសង្រ្គោះជាតិ ដែលកំពុងរត់គេចខ្លួនទៅក្រៅប្រទេស ត្រូវបានសកម្មជនរបស់ខ្លួនទម្លាយ អំពីអំពើក្បត់ជាតិដោយភ្ជាប់វីដេអូរបស់លោកចុះកិច្ចព្រមព្រៀង ជាសម្ងាត់ជាមួយមេដឹកនាំជនជាតិវៀតណាមម៉ុងតាញ៉ា កាលពីឆ្នាំ២០១៣ ដើម្បីប្រគល់ឱ្យជនជាតិភាគតិចវៀតណាមទាំងនោះ គ្រប់គ្រងខេត្តចំនួន៤ ដោយស្វ័យប្រវត្តិ បើសិនជាគណបក្សសង្រ្គោះជាតិឈ្នះការបោះឆ្នោតជាតិ នៅឆ្នាំ២០១៣។ ខេត្តកម្ពុជាចំនួន៤ ដែលលោកសម រង្ស៊ី ប៉ុនប៉ងកាត់ទៅឱ្យជនជាតិភាគតិចវៀតណាមនេះ រួមមាន៖ ខេត្តរតនគិរី មណ្ឌលគីរី ស្ទឹងត្រែង និងខេត្តក្រចេះ ជាដើម។
![](https://theothertruth.info/wp-content/uploads/2022/10/photo_2022-10-22_17-52-27-1024x631.jpg)
លោក សម រង្ស៊ី ក៏ត្រូវបាន តំណាងអយ្យការអមសាលាដំបូងរាជធានីភ្នំពេញ ចោទប្រកាន់ពីបទ «ប៉ុនប៉ងប្រគល់ឱ្យរដ្ឋបរទេសនូវដែនដីជាតិមួយផ្នែក» ប្រព្រឹត្តិទៅនៅរាជធានីភ្នំពេញ និងទីកន្លែងផ្សេងៗទៀត កាលពីថ្ងៃទី១៤ ខែមេសា ឆ្នាំ២០១៣ បទល្មើសដែលមានចែងឱ្យផ្តន្ទាទោសតាមបញ្ញត្តិមាត្រា២៧ និងមាត្រា៤៤០ នៃក្រមព្រហ្មទណ្ឌផងដែរ។
ការចុះកិច្ចព្រមព្រៀងរបស់ លោក សម រង្ស៊ី បានធ្វើឱ្យប្រជាពលរដ្ឋខ្មែរ គណបក្សនយោបាយ និងស្ថាប័ននានា ចេញប្រតិកម្ម និងថ្កោលទោសយ៉ាងខ្លាំង ដោយចាត់ទុកថា ជាទង្វើក្បត់ជាតិដ៏ធ្ងន់ធ្ងរបំផុត មិនអាចលើកលែងឱ្យបាន៕
ដកស្រង់ចេញពី freshnews