ឯកសារមួយដែលត្រូវបានផ្សព្វផ្សាយជាសាធារណៈដោយសារព័ត៌មានអ៊ុយក្រែន Strana ហើយត្រូវបានបង្ហោះដោយបណ្ដាញផ្សាយព័ត៌មាននៃប្រទេសអ៊ុយក្រែន និងសារព័ត៌មានក្នុងបស្ចិមប្រទេសមួយចំនួនទៀត បានឱ្យដឹងថា ផែនការសន្តិភាពរបស់លោក ដូណាល់ ត្រាំ និយាយអំពីការបង្ខំឱ្យរដ្ឋាភិបាលប្រទេសអ៊ុយក្រែន ពុះច្រៀកទឹកដីដើម្បីបញ្ចប់សង្គ្រាម ដោយទឹកដីទាំងនោះប្រគល់ទៅឱ្យរុស្ស៊ី។
យោងតាមឯកសារដដែលនេះដែលត្រូវបានបញ្ចេញក្នុងផែនការសន្តិភាពលោក ដូណាល់ ត្រាំ នេះ មានការកំណត់ជាក់លាក់ពីការអនុវត្តបទឈប់បាញ់នៅថ្ងៃទី២០ ខែមេសា ឆ្នាំ២០២៥ ជាមួយនឹងការបញ្ឈប់កងទ័ពរុស្ស៊ី មិនឱ្យរុលចូលខាងក្នុងទឹកដីប្រទេសអ៊ុយក្រែន ទៀតនោះទេ។
ឯកសារដែលត្រូវគេបង្ហោះជាសាធារណៈនេះ បានបញ្ជាក់ថា ថ្ងៃទី០៩ ខែឧសភា ឆ្នាំ២០២៥ គឺជាថ្ងៃប្រកាសបិទបញ្ចប់សង្គ្រាមជាស្ថាពររវាងរុស្ស៊ី និងអ៊ុយក្រែន។ ជាមួយគ្នានេះ ផែនការសន្តិភាព ក៏បានបញ្ជាក់ផងដែរអំពីការជួយស្ដារប្រទេសអ៊ុយក្រែន ឡើងវិញ ក្នុងទំហំទឹកប្រាក់ ៤៨៦ពាន់លានដុល្លារសហរដ្ឋអាមេរិក ដែលទំហំហិរញ្ញវត្ថុនេះត្រូវជួយអ៊ុយក្រែន អំឡុងរយៈពេល ១០ឆ្នាំ។ ចំណែករុស្ស៊ី ត្រូវចេញមូលនិធិដើម្បីជួយស្ដារប្រទេសអ៊ុយក្រែន ឡើងវិញ។
តាមឯកសារបែកធ្លាយនេះ បានឱ្យដឹងទៀតថា នឹងមានការចាប់ផ្ដើមសន្ទនាគ្នារវាងលោកប្រធានាធិបតីអ៊ុយក្រែន វូឡូឌីមៀ ហ្សេឡេនស្គី និងលោក វ៉្លាឌីមៀ ពូទីន នៅចុងខែកុម្ភៈ ឬក៏ដើមខែមីនា ឆ្នាំ២០២៥ ដើម្បីកំណត់ពីការអនុវត្តយកថ្ងៃទី២០ ខែមេសា ឆ្នាំ២០២៥ ជាថ្ងៃត្រូវបញ្ឈប់ការប្រយុទ្ធគ្នា។
ចំពោះការប្រកាសមួយលើកិច្ចព្រមព្រៀងដើម្បីបញ្ចប់សង្គ្រាមត្រូវយកថ្ងៃទី៩ ខែឧសភា ឆ្នាំ២០២៥ ដោយភាគីទាំងពីរចេញសេចក្ដីថ្លែងការណ៍ជូនដំណឹងប្រាប់ទៅប្រជាជន និងកងទ័ពរបស់ខ្លួនរៀងៗខ្លួន។
ប៉ុន្តែឯកសារដែលបញ្ជាក់អំពីការច្រៀកពុះទឹកដីឲ្យរុស្ស៊ី ក៏អ៊ុយក្រែន បានផលប្រយោជន៍ឡើងវិញដែរ គឺទីមួយ អាមេរិកបន្តគាំទ្រវិស័យយោធារបស់អ៊ុយក្រែន និងឲ្យអ៊ុយក្រែន ក្លាយជាសមាជិកសហភាពអឺរ៉ុប នៅឆ្នាំ២០៣០។
តែយ៉ាងណា ការសម្រេចលើកលែងការដាក់ទណ្ឌកម្មទៅលើប្រទេសរុស្ស៊ី ដែលរួមទាំងទៅលើទណ្ឌកម្មថាមពលប្រេងត្រូវបញ្ឈប់រាប់ទាំងការរឹបអូសទ្រព្យសម្បត្តិរុស្ស៊ី ផងដែរ។
យោងតាមបណ្ដាញផ្សាយព័ត៌មាននៃប្រទេសអ៊ុយក្រែន រដ្ឋាភិបាលលោក ហ្សេឡេនស្គី បានហៅការបែកធ្លាយឯកសារនេះថាជាការបញ្ចេញសារមួយដើម្បីប្រាប់ឱ្យដឹងថា ផែនការសន្តិភាពរបស់លោក ដូណាល់ ត្រាំ មានចំណុចខ្លាំង និងចំណុចខ្សោយ។
ត្រង់ចំណុចមួយដែលនិយាយពីការកាត់ទឹកដី លោក Andriy Yermak នាយកខុទ្ទកាល័យប្រធានាធិបតីអ៊ុយក្រែន បានច្រានចោលនូវចំណុចដែលបង្ខំឱ្យអ៊ុយក្រែន កាត់ច្រៀកទៅឱ្យរុស្ស៊ី ជាថ្នូរនឹងការផ្ដល់មកវិញ គឺសន្តិភាពពីរុស្ស៊ី និងបញ្ចប់សង្គ្រាម។
អ្នកនាំពាក្យក្រសួងការបរទេសរុស្ស៊ី វិញ អ្នកស្រី Maria Zakharova បានថ្លែងថា ទីក្រុងមូស្គូ បានឮសម្ដី និងសេចក្តីថ្លែងការណ៍ជាច្រើនពីទីក្រុងវ៉ាស៊ីនតោន ស្ដីពីអ៊ុយក្រែន ហើយមកដល់ពេលនេះ មិនទាន់មានភាពច្បាស់លាស់អំពីអ្វីដែលសហរដ្ឋអាមេរិករំពឹងទុកក្នុងការស្វែងរកកិច្ចព្រមព្រៀងដើម្បីបញ្ចប់សង្គ្រាមនៅឡើយទេ។
គេនៅចាំបានថា មុនលោក ដូណាល់ ត្រាំ ចូលកាន់តំណែង ក្រុមជំនួយការរបស់លោក ត្រាំ បានបញ្ចេញឯកសារម្ដងរួចទៅហើយ គឺពេលនោះ ផែនការសន្តិភាពរបស់លោក ដូណាល់ ត្រាំ មាន ៣ចំណុចសំខាន់ៗ គឺ៖
ទីមួយ ការអនុវត្តបទឈប់បាញ់គ្នា ដោយកម្លាំងទ័ពអឺរ៉ុបជាកងរក្សាសន្តិភាព ហើយអង់គ្លេស ឈានមុខគេក្នុងការដឹកនាំក្រុមកងរក្សាសន្តិភាពសម្រាប់ប្រទេសអ៊ុយក្រែន។
ទីពីរ តំបន់ដែលរុស្ស៊ី វាយកាន់កាប់បានពីដៃទ័ពអ៊ុយក្រែន មិនអាចក្លាយជាទឹកដីរបស់រុស្ស៊ី តែវាជាតំបន់ស្វយ័ត។ មានន័យថា រដ្ឋបាលតំបន់ស្វយ័តនេះមិនចំណុះឱ្យរុស្ស៊ី និងក៏មិនចំណុះអ៊ុយក្រែន ដែរ។
និងទីបី ប្រទេសអ៊ុយក្រែន មិនអាចក្លាយជាសមាជិកណាតូ (NATO) ភ្លាមៗបាននោះទេ គឺរង់ចាំ ២០ឆ្នាំទៅមុខទៀត។
ប៉ុន្តែផែនការសន្តិភាពដែលបង្ហើបដោយជំនួយការរបស់លោក ដូណាល់ ត្រាំ ដូចនេះ ត្រូវបានភាគីរបស់រុស្ស៊ី ប្រកាសមិនទទួលយក ជាពិសេសត្រង់ចំណុចពីការដាក់ពង្រាយកងទ័ពអឺរ៉ុប នៅលើទឹកដីនៃប្រទេសអ៊ុយក្រែន។
ទោះជាយ៉ាងណាក៏ដោយ លោក ហ្សេឡេនស្គី បានថ្លែងថា ការចរចា ៤ភាគី ទើបអ៊ុយក្រែន យល់ព្រមទៅចរចា។ ការចរចា ៤ភាគីនេះ ត្រូវតែមានភាគីសហភាពអឺរ៉ុប និងសហរដ្ឋអាមេរិក នៅចំពោះមុខភាគីច្បាំងគ្នា គឺរុស្ស៊ី និងអ៊ុយក្រែន នៅឯតុចរចា៕
ដោយ៖ ឌឹ ខេមបូឌា ដេលី
